Kya itna kathin hai?

Kae dino se khayaal aata hai

Itna mai badal kaise gaya? 

Kal hi ki toh baat thi

Jab khule aasmaan me pakshi bhaati

Uda karta tha

Koi fikr nahi

Koi khauf nahi

Bas bepaak iradey 

Aur meri udaan! 

Aaj sochta hun

Toh chal paana bhi kathin lagta hai

Udna toh jaise khwab me bhi ab mumkin nahi

Sochta hun khud ko aks me dekhkr harwakt aajkal

Ye sakhs ko toh mai jaanta tha kabhi

Iske har pehlu ko pehchaanta tha kabhi

Fir aaj ye itna badal kaise gaya? 

Wakt k haatho ye itna sehem kaise gaya? 

Yun lagta hai maano

Masumiyat ab iske bichde kal k fasaaney ban gae

Kya itna mushkil hai khud ko khud jaisa rakh pana? 

Kya itna kathin hai, badaltey samay me khud ko pehle ki tarah samet pana? 

Shaayad haa!  bahaut kathin hai

Tabhi toh aaj bachpan ki wo tasveer dekhi 

Toh khud ko khil khila kar hasta dekh

Achambhit ho gaya! 

Kyuki ab toh haal ye hai , 

Ki mushkurana bhi tasveer lene se pehle

Kisi aur ko muje yaad dilana padta hai.. 

-Damini 

Tumse hi toh sikha hai!

Wo diya dekh rahi ho

Aur usme jilmilati baati

Wo baati mai hun

Tel toh diye mein hamesha se hi kam tha

Haa par itna kam bhi nahi ki baati bujh jae

Par itna paryaapt bhi nahi ki har hawa k jhokho se wo lau lad jae

Haalanki hawao ka jokha hi sirf nahi kae aandhiya bhi aen

Sabne socha baati ka wajood mit jaeyega

Thodi der aandhi aur rahi toh ye diya bhi bujh jaeyega

Aur shaayad aisa ho hi jata

Gar tumhari di hui himmat na hoti toh

Baat ye nahi ki aaj kitna mila kitna gawaya

Shaayad ginti karne baithu toh hisaab me gawaaya hua kae zaada hi niklega

Aur jo bhi paaya wo dubtey ko tinkey sahaara matr hi lagega

Par jo bhi hai,  hai toh sahi… 

Gar poochogi ki kya itne ladaai ladh kar, lau thak nahi gae hai? 

Haa! thak toh gae hai

Par jazbaa kaayam rakhna toh tumse hi sikha hai

Mai tumhara kaha.. aur unkahaa sab sametey timtimati rahungi

Tel ki aakhri boond tak jalti rahungi

Andhera mere bujhne se pehle mere aas pass kabhi nahi hoga

Khud jal sabko raushni dena

Aakhir ye bhi toh tumse hi sikha hai..

-Damini