Naa jaane kyun?

Naa baitha koi pal bhar bhi mere saath

Jab tak thi es Jism me jaan

Ab maut k baad,

Chaaro ore se mujhe ghere Jaa rahe hai

Naa jaane kyu befizul Dikhawaa kiye jaa rahe hai

Naa poocha kabhi haal tak jinhone,

Wo aaj mere liye aansu bahaa rahe hai

Naa thi kisi ko meri ek wakt ki Roti ki bhi chinta

Par aaj desi ghee mere muhh me daale jaa rahe hai

Naa jaane kyun befizul Dikhaawa kiye jaa rahe hai..

Naa kabhi bhet kiya ek rumaal tak jinhone

Wo aaj shawl aur Chaddar mujhe odhaaye jaa rahey hai

Jaante hai wo naa zarurat hai en chizo ki ab mujhe

Fir bhi naa Jaane kyun befizul Dikhawaa kiye jaa rahe hain

Doli mein bithaane ko,

Naa nikley the koi bhi apne ghar se

Aur aaj kandhe pe lejaane ko..

Jamghat lagaa rahe hai

Jo Naa hue the kabhi bhi mere dukh me shaamil

Ab wahi log mere jaane ka shok manaa rahe hai

Naa jaane kyun befizul Dikhawaa kiye jaa rahe hai

Aaj aaya Samajh mein..

Zindagi se bhi zaada kimti hai maut yahaa

Tabhi toh sukhi bejaan haddiyo ko mere

Chandan ki mehngi lakdiyo se Sajaa rahe hai…

Naa jaane kyu befizul Dikhawaa Kiye jaa rahe hai

-Damini Shah